Сăпка юрри ][ Петĕр Хусанкай / Petĕr Husankaj

Атнере

Сĕм вăрманĕ каш та каш,
Сулхăн çилĕ ваш та ваш,
Эс ан çуйăх, ан çухраш,
Çывăр, пĕчĕкçĕ чăваш!

Урупа ан тапкалаш,
Аллупа ан çапкалаш,
Аннÿпе эс ан тавлаш,
Çывăр, Аптраман тавраш!

Ашă çумăр чаш та чаш,
Ÿс, калчам, çĕклен эс яш,
Çÿлерен çÿле кармаш.
Çывăр, пĕчĕкçĕ чăваш!

Юлташпа эс пул юлташ,
Усалпа эс ан паллаш.
Тăшманпа ан пул йăваш,
Çывăр, Аптраман тавраш!

Вырăспа та тăванлаш,
Тутарпа та эс туслаш,
Пурте — пирĕн хурăнташ,
Çывăр, пĕчĕкçĕ чăваш!

Малалла утсан — малаш,
Каялла юлсан – каяш,
Чăн çултан эс ан аташ.
Çывăр, Аптраман тавраш!

Raşşej Feterazzĭ Kimnĕ ][ Jurĕj Sementer / Юрий Сементер

Раççейĕмĕр — пирĕн сăваплă патшалăх,
Раççейĕмĕр — эсĕ ялан чĕрере.
Чысу, хисепÿ сан — тĕнче ăмсанмалăх,
Яту çĕкленет ĕмĕртен ĕмĕре!

Чаплă, мухтавлă пул, ирĕк Раççейĕмĕр,
Пирĕн тĕрек — тăванла туслăхра.
Халăх ăс-хакăлĕ — çутă тивлетĕмĕр!
Савăн, çĕршыв! Пирĕн шанăç санра!

Инçет кăнтăртан çурçĕре ал параççĕ
Куçпа виçейми вăрмансем те хирсем.
Санра, аслă çĕрĕмĕр, Турă хăвачĕ,
Санра иксĕлми пархтар та илем!

Чаплă, мухтавлă пул, ирĕк Раççейĕмĕр,
Пирĕн тĕрек — тăванла туслăхра.
Халăх ăс-хакăлĕ — çутă тивлетĕмĕр!
Савăн, çĕршыв! Пирĕн шанăç санра!

Ĕçсем, ĕмĕтсем малалла çул уçаççĕ,
Пире пил парать çĕнĕлле самана.
Таса тивĕçпе ĕненÿ асамачĕ
Вăй-хал кÿрсе тăрĕ пире яланах!

Чаплă, мухтавлă пул, ирĕк Раççейĕмĕр,
Пирĕн тĕрек — тăванла туслăхра.
Халăх ăс-хакăлĕ — çутă тивлетĕмĕр!
Савăн, çĕршыв! Пирĕн шанăç санра!

Атте-анне чĕлхипе ][ Эмине / Emine

Ют кайăка усрама
Пирĕн улăх ытла мар,
Хăш çĕртен вĕçсе килтĕр
Унталлах кайса пĕтĕр.

Ют йăлана юрама —
Хамăр йăла начар мар.
Хăш çĕртен ютсем килтĕр —
Унталлах кайса пĕтĕр.

Хамăр çĕр хамăр асра,
Мĕншĕн парас тăшмана?
Турă панă çĕршывра
Хамăр ларар хуçара!

Атте-анне сăмахне,
Аслаттейсен чĕлхипе
Тутарсемшĕн манас мар,
Хыт чĕреллĕ пулас мар.

Халал ][ Пайтул / Pajtul

Питĕ сивĕ хĕл кунĕ,
Тăлăп тăхăн, хăна.
Сивĕнмест-ха çын чунĕ
Хĕл сиввишĕн кăна.

Чăвашпа чăваш пултăр
Çывăх тус та юлташ.
Кĕвĕçӳ сан ан пултăр,
Усалпа ан аташ.

Çак сăмах — ман йыхравăм,
Çак сăмах — ман халал.
Çак сăмах — ман ялавăм,
Йăлт тасалтăр усал!..

Ăнлантаркăч

1935 çулта Шупашкарта пурăнакан Иван Ильинран П.Ф.Филиппов учитель çырса илнĕ. Юхма Мишши архивĕнче упранать.

 

Эпир чăваш йăхĕнчен ][ Пайтул / Pajtul

Хура курак ялан хура, —
Шуратса пĕтерес çук.
Тăшман тени ялан кăра, —
Хăраса тарассăм çук.

Хăраса пурăнар мар, —
Эпир хамăр çĕр çинче…
Пуç усса пурăнар мар, —
Эпир чăваш йăхĕнчен.

Урхамаха йĕнерлер те
Тăшмана хирĕç каяр.
Çут хĕçе çӳле çĕклер те
Тăшмана йăлт тĕп тăвар.

Ăнлантаркăч

1937 çулта Ишек ялĕнче 90 çулхи Пархиле Федоров старикрен П.П. Юркин тĕпчевçĕ çырса илнĕ.

Чăваш тăшманĕ пĕтмелле ][ Пайтул / Pajtul

Ялтан тухса, мăн Атăл хĕррипе
Урхамаха сиктертĕм васкатса.
Кĕрешĕве чĕнеп чăвашсене, —
Хĕçе çĕклерĕм, ĕмĕт çуратса.

Вăрмансенче те аслă хирсенче
Хăравçă кайăк пек пытанар мар.
Ытарайми чăваш çĕршывĕнче,
Чăваш çынни, сассуна пар!

Кала эс хыттăн: “Эпĕр чура мар.
Чăваш тăшманĕ пĕтмелле!”
Чăваш çынни, хăватлăн сасă пар,
Чăваш çынни, хĕçне çĕкле!

Чăваш çынни, тăван, хастар пулар,
Чăваш çынни, хĕçне çĕкле!
Чăваш çылнни, халь курăр, чура мар,
Чăваш тăшманĕ пĕтмелле.

Ăнлантаркăч
1935
çулта Шупашкарта пурăнакан Иван Ильин ватă юрăçăран П.Ф.Филиппов учитель çырса илнĕ. П.Ф. Филиппов ăна 1991 çулта “Вучах” хаçат редакцине, Юхма Мишши патне упрама, май пулсан, пичетлеме ярса панă. Юхма Мишши архивĕнче упранать.