Георгий Орлов: Август

Г. Орлов

---

Август

Уй-хирти ĕç шавĕ нихçанхинчен те хĕрсе çитрĕ. Кăнтăрла та, çĕрле те вăл пĕртте лăпланмасть. Хăйĕн пĕтĕм вăйне ял кунта пухнăн туйăнать. Комбайнсем тырă выраççĕ. Грузовиксем вырнă тыррине турттарса тăраççĕ. Ушкăн машина улмури купалать. Ана пушанать çеç — тракторсем сухалама пырса кĕреççĕ, теприсем кĕрхи ыраш, тулă акаççĕ… Мĕн кăна тумасть пулĕ çĕр çынни! Алли ун пур çĕре те вăхăтра ĕлкĕрет. Халăха август пысăк пурлăх пама пулнă, халĕ вăлах çавна илме, йăлтах тирпейлĕ пуçтарса кĕртме васкатать.

Георгий Орлов: Çуллахи вăрманта

Георгий Орлов

---

Çуллахи вăрманта

…Июнь çитрĕ. Çĕртме тенĕ ăна пирĕн асаттесем. Чечек уйăхĕ теме те пулать ăна.

Улăх-çаранта çеç мар, вăрман чечекĕсем те, пĕр-пĕринпе тупăшса тенĕ пекех, çеçке сараççĕ. Уçланкăсем, çеремлĕ вар севекĕсем шуррăн, саррăн, кăваккăн-хĕрлĕн — тем тĕрлĕ тĕспе те тĕрленсе ытарайми капăрланаççĕ. Сывлăш, çăрăлса тасалнăскер, сиплĕ ăсла пек туйăнать. Унта та кунта пыл хурчĕсем сĕрлени илтĕнет. Шăрчăксем чăр-латаççĕ. Пур çĕрте те кайăксен юрри янăрать.

Георгий Федоров: Çу Çитрĕ

Г. Федоров

---

Çу Çитрĕ

Тÿпеми пулмалăх тулчĕ
Çырмана сĕт пек тĕтре.
Нÿрĕк сыпрĕ курăк-çулçă
Ăмсанса ăна хитрен.

Геннадий Айхи ][ Çуллахи çыру

Хуллен, пуçа мĕн килнине, çыратăп,
юри сана аса илес тесе,
епле шухăшланать — çав йĕркепе.
Тулта, лутра тĕкме çумĕпеле,
пĕр вĕлтĕрен çинчен тепри çине шевле,
кăрт-кăрт йĕр ÿкерсе куçать.
Пĕр шухăш пур: çапла çыру çырасчĕ,
шухăшăма йĕркеллĕн пĕлтерсе»
пуçласчĕ: «Эп ирех паян вăрантăм,
чие тĕмне сăнарăм кантăкран,
вара сана асилтĕм. Пĕлтерем-и:
кашни сехетĕм ман çапла иртет.
Ак халĕ те: вĕлтĕренсем çинче
шевле кăрт-кăрт йĕр ÿкерсе куçать,
ман шухăшăн йĕрки пек: кунĕпе
сана аса илетĕп: тĕл пуласчĕ;
кунсем иртеççĕ; таврăн хăвăртрах».
1955