Николай Шелепи: Çĕлен


Николай Шелепи

1881-1945

Николай Шелепи – поэт, литература ĕçченĕ. Вырăссен пĕрремĕш революцине путарсан, Çĕпĕре каять. 1922 çулта Шупашкара куçсан, литература ĕçне хастарлăрах кÿленет. Суккăрланать… Тĕплĕнрех →


Çĕлен

Турă сăмах каласа
Çĕртен çынна пултарсан,
Тухса выртнă çĕр çине
Çĕр пысăкăш пĕр çĕлен.
Çĕлен ури пĕртте çук.
Çĕлен çитмен çĕр те çук;
Çакă çĕрĕн çийĕнче
Çĕлен сăхман çын та çук.

Çутă хĕвел çутти пек,
Вĕçсе çÿрет пĕр кайăк; –
Пуçне çĕклет çав çĕлен
Кайăк çине пăхмашкăн,
Çĕлен сăнни çитес çук
Çав кайăка сăхмашкăн.
Çĕлен çине пăхать кайăк
Хăйĕн çĕр пин куçĕпе,
Пĕтĕ халь пĕрре çĕлен
Ĕмĕрлехе пуçĕпе.

Çĕлен чĕтресе выртать,
Çав кайăкран хăраса;
Кайăк çиçĕм пек çÿрет,
Чăнлăх çутти шыраса.
Кайăк çутти кансĕррипе
Çĕлен çĕре кĕринччĕ,
Çав кайăкран хăранипе
Çĕлен çĕрте çĕринччĕ.
Кайăк çÿлтен çĕре ансан,
Çĕлен куçне уçаймĕ,
Çав кайăкран хăранипе
Вырăнĕнчен куçаймĕ.

Кайăк чĕрни пин пулчĕ,
Çĕлен чĕри çук пулчĕ,
Çĕрпе шывăн пичĕ çине
Мулшăн тăкнă юн тулчĕ.
Кайăк часрах килинччĕ,
[Çĕлене вĕлеринччĕ][i],
Чăн чăнлăха пĕлтерсе,
Пире тĕлĕнтеринччĕ.
. . . [ii]

Юнпа куççуль нумай юхнă
Çĕлен çĕрте выртнăран;
Çĕлен ÿчĕ юн юхтарать
Кайăк анса çыртнăран.
Çĕлен пĕрре вилĕ-ха,
Ĕмĕрлĕхе пĕтĕ-ха,
[Нумай юнсем юхĕ-ха][iii]
Çĕлен халĕ çĕр çинче
Кунĕн-çĕрĕн юн ĕçет.
Кайăк çĕрĕн вĕçне-хĕрне
Ылттăн çунатпа вĕçет.

1906


Г. Юмарт:

[i] Хыпарти» текстра ку йĕркене цензура кăларса пăрахнă.

[ii] Пăнчăсем лартса тухнă йĕрке тĕлĕнчи вырăна редакци кĕскетнĕ пулас.

[iii] «Хыпарта» текстра ку йĕркене цензура кăларса пăрахнă.

Шухăшăра пĕлтерĕр

Fill in your details below or click an icon to log in:

WordPress.com Logo

WordPress.com аккаунчĕпе усă курса комментари çыратăр. Çырăнса тухас /  Улăштарас )

Google фото

Google аккаунчĕпе усă курса комментари çыратăр. Çырăнса тухас /  Улăштарас )

Twitter picture

Twitter аккаунчĕпе усă курса комментари çыратăр. Çырăнса тухас /  Улăштарас )

Facebook фотойĕ

Facebook аккаунчĕпе усă курса комментари çыратăр. Çырăнса тухас /  Улăштарас )

Connecting to %s

Ку сайт спамсене сахаллатмашкăн Akismet-па усă курать . Комментари даннăйĕсен обработки çинчен тĕплĕнрех пĕлĕр.