Акатуй Каччисем
(Марш)
Ялйышăм ян кайрĕ
Ирхи хыпарпа —
Туй пуçĕ çÿрет-мĕн
Улма чăпарпа.
— Вăранăр, атьсемĕр,
Хĕвел хăпарать,
Садра сарă кайăк
Юрра шăратать.
Çăл шывĕпе уçăр
Пит-куçăрсене,
Йĕнерлĕр, утланăр
Ыр утăрсене!
— Эй, Акатуйĕ!
Кам мала?!
Хĕрсен парни
Кама пулмалла?!
— Кала эс, туй пуçĕ,
Кам учĕ маттур?
Кама мухтамашкăн
Сан шухăшу пур?
— Эй, кам урхамахĕ
Çил пек çăрхалать,
Йĕнер çийĕнче
Кам хăлат пек ларать,
Кам хатĕр каймашкăн
Буденный çарне —
Çавна халаллатпăр
Чи лайăх парне.
— Эй, Акатуйĕ!
Кам мала?!
Хĕрсен парни
Кама пулмалла?!
Кам иртĕ, атьсемĕр,
Колхоз каччинчен?!
Вут çеç сирпĕнетĕ
Такан качинчен.
Пире ал сулаççĕ
Хĕвел пек хĕрсем,
Пире ыр сунаççĕ
Атте-аннесем.
Утсем тулхăраççĕ,—
Туй пуçĕ, ертсем:
Туя та,
Вăрçа та
Чăн хатĕр вĕсем!
— Эй, Акатуйĕ!
Кам мала?!
Хĕрсен парни
Кама пулмалла?!
1936
Вула Чăвашла 