Сăваплă Кĕтес
Хула хĕрри улах. Сĕве йăвашшăн
Пахча çуммисемпе иртсе каять…
Çак лăпкă кĕтесре тăван чăвашшăн
Çуралнă ĕлĕк чух пĕр çамрăк ят.
Ак ун кĕперĕ, вăл юратнă вырăн,
Ак вăл час-час таяннă ват йăмра.
Паян та вăл кунта çÿрет пек ыррăн,
Тăрать пек сыввăн умăмра.
Ун лăпкă куçĕсем йăл-йăл тăваççĕ,
Ун сăнĕнче — те хурлăх, те телей…
— Мĕнле пурнан? Мĕнле çĕршыв хăвачĕ?
Ман шăллăмсем нумай-и, Ваçилей? —
Тесе ыйтассăн тăрать пек поэтăн
Шухăшăмра çĕкленнĕ ĕмĕлки…
— Аван, манми тете, аван,— теетĕн.—
Сывлать чăвашăмăр, сывлать чĕлхи.
Çак пирĕн ÿсĕмри чăваш этемĕ
Иртме шанать чăн пурнăç тĕпелне.
Çитет пире, çитет — тертленнĕ,
Лаххан таврашĕнче çитет-тĕр йĕпенме!
Чăвашăн ăншăртран сывалнă куçĕ
Культура кил-çуртне пăхса илет.
Телейлĕх тупсăмне хăех вăл уçĕ,
Хăех туянĕ хăй валли тивлет.
Эх, Константин! Пирĕнпеле пулсамччĕ,
Пулсамччĕ кĕрекере илем пур чух…
Анчах мĕскершĕн-ши! нимле асамçăн
Сан ыйхăна сирме хăвачĕ çук…
1927
Вула Чăвашла 