Çĕр ыйхăран вăранать

Н. Матвеев

---

Хĕвел çÿлтен çÿле хăпарса пырать. Апрель уйăхĕн малтанхи кунĕсенчех çырмасене шыв анса тулать, пăр вырăнтан хускалать. Юртан тасалнă йывăçсен, пĕлтĕрхи йĕпе курăксен хăйне евĕрлĕ шăрши çуркунне çитнине пĕлтерет.

Хĕл каçа пухăннă юр кĕске хушăрах ирĕлсе пĕтет те кĕрлесе юхса каять. Çакăн хыççăн улăх-çаран, вăрмансем ешерме тытăнаççĕ. Кĕрен, кăвак çеçпĕлсем вăрман уçланкине асамлă юмахри пек тăваççĕ.

Улăпсем

Улăп халапĕ

Ĕлĕк-авал, çĕр çине шыв туличчен малтан, питĕ пысăк çынсем пурăннă теççĕ. Вĕсене Улăпсем тесе чĕннĕ. Пĕрре ярса пуссан вун икĕ çухрăм ярса пусатчĕç тет. Вăрманти юмансене йĕм пĕççине чĕрет тесе армути вырăнне кăкла-кăкла ывăтатчĕç тет. Улăпсем утса çÿресе ывăнсан канма ларнă. Çăпатисене салтса тулнă тăприне силленĕ те — çав вырăнта Улăп тăприсем пулса тăнă.