Митта Ваçлейĕ
• Суя тĕн
• Нацио-нализм
Çĕршывăм, çĕршывăм, мĕн кирлĕ сана?
Мĕскер эс ыйтатăн? Мĕскер ăмсанан?
Пуянлăх, хаваслăх е ĕмĕрлĕх ят,
Е иксĕлми паттăр асамлă хăват?
Кала эс, çĕршывăм, кала эс пире:
Туятăн-и пирĕн хĕвеллĕ ире?
Туятăн-и эсĕ: çак пирĕн чĕре —
Пĕр саншăн тапать вăл, пĕр саншăн хĕрет.
Чи сиплĕхлĕ, хаклă таса çăлкуç пек,
Сан сывлăш-хăватшăн пулатпăр пуçпех.
Хĕрхаллĕн тасалăх санра упрама
Çап-çамрăк чĕремĕр — çунан вутама.
Асаплă ĕнерĕн палли-çĕввисем
Паян кун çухалĕç, якалĕç вĕсем.
Юханĕ-шăтанĕ е ирсĕр кĕсен
Нихçан пусмăрлаймĕ ванми никĕсе.
Çĕршывăм, çĕршывăм, мĕн кирлĕ сана?
Мĕскер эс ыйтатăн? Мĕскер ăмсанан?
Е пурлăх, хаваслăх е ĕмĕрлĕх ят?
Е иксĕлми паттăр, асамлă хăват?
Вăл пулĕ, çĕршывăм, вăл пулĕ пурте!..
Чăн аслă вутамăш хăвачĕ пирте!
1926
Вула Чăвашла 