Утă Çинчи Ир
Чипер хĕрсемпе
Тек хавасланса,
Акă çитрĕмĕр
Халăх çаранне.
Чăшăл та вăшăлт
Лапаткаласа[i],
Кăларар çаван
Вутлă хăватне.
Çĕкленсем, вăй-хал!
Ыткăн тилмĕрсе
Сарă кайăкăн
Ирĕк сассипе.
Чашлаттар, çавам!
Курăк хирĕлсе
Юлтăр пĕр енне
Касси-кассипе.
Атьăр-ха, хĕрсем,
Йĕрĕ йĕкĕтсем,
Сывлăм шăрçине
Типиччен сăвар.
— Кам вăл хыçалта?
Петĕр, хĕтĕртсем!
Ху савни пулсан —
Хăнтан ан хăвар!
Ыткăнса пырса,
Вăйлă çарана
Хыртаратпăр çеç,
Çÿçкасуçă пек.
Паккус[ii] вĕçĕнче
Темшĕн ак мана
Савнă тус çиет
Шухă куçĕпе.
— Вăхăт çук чухне
Ан пăх, ан астар!
Çитĕ кĕркунне,
Çитĕ ак улах.
Вара тин ун чух
Куçупа кастар,
Савăнса вылях,
Савăнса кулах.
Халĕ çиçтерер
Çамрăк вăй-хала,
Пĕрĕхер илем
Аслă çарана.
— Эй, Иван-пăван,
Ватă мĕн калать!..
Вăркăнтар, Иван,
Çутă çавуна!
Çăмăл та хастар
Хĕр-йĕкĕт кулли,
Ирĕк те хавас
Ярăнса тăрать.
Паккус çĕкленет
Кăмăл пек тулли,
Çамрăк ывăнмасть,
Çамрăк çунтарать.
Хăпарать хĕвелĕ
Пайăрка ярса,
Шăратать саркайăк
Ирхи юррине.
Хăнăхнă ĕçхалăх,
Пĕр Хĕрсе кайсан,
Нихăçан туймасть вăл
Канлĕх пуррине.
Канлĕх унăн — пурлăх.
Канлĕх ун ĕçре.
Вăхăтра ĕçлетпĕр,
Вăхăтра канар.
Эй, çĕклен, вăй-халăм,
Сулăн çивĕчрех!
Уй-хирти тивлетшĕн
Çулăм кăларар!
1926
[i] Çивĕчлетсе. – VulaCv
[ii] Утă карти. – VulaCv
Вула Чăвашла 