Пирĕшти

Гурий Комиссаров (Вантер)

---

Пирĕшти

Шыв хĕррипе пыраттăм,
Шыва кĕме каяттăм.
Арман патне çитсессĕн,
Йывăç тĕми хумханчĕ, –
Пирĕшти сăнĕ курăнчĕ.

Пăхрĕ илчĕ ман çине –
Ирĕлтерчĕ чĕрене.
Эпĕ пăхрăм çаврăнса.
Курчĕ – тути йăл кулчĕ,
Йывăç ăшне пытанчĕ.

Çăвĕ иртрĕ, кĕр çитрĕ –
Пирĕшти асран каймарĕ:
Çара ура, шурă кĕпе,
Панулми пек пит çăмарти,
Чие çырли пек тути;

Ункăн-ункăн хура çÿç,
Пĕлĕт тĕслĕ кăвак куç,
Вăлта хулли – кĕлетки
Мана канлĕх памаççĕ,
Арман еннех туртаççĕ.

1904